Enmarcamos esta decisión no contexto da proceso de expansión imperialista en Europa do Leste e da campaña represiva do goberno de Kiev, dominado por unha xunta criminal respaldada polos monopolios europeus e norteamericanos.

O Movemento Galego ao Socialismo denuncia a persecución anticomunista desenvolvida polo ilexítimo goberno ucraíno, que accedeu ao poder por medio dun golpe de Estado alentado e respaldado pola Unión Europea e os Estados Unidos. Esta campaña inclúe a ilegalización do Partido Comunista da Ucraína e a prohibición de todos os símbolos e propaganda comunistas, o que na práctica se traduce na criminilización e censura absoluta da ideoloxía e a práctica marxista.

O pasado 17 de decembro o Tribunal de Apelación ucraíno ratificou a decisión do goberno de ilegalizar o Partido Comunista. Trátase dunha decisión política que busca unha vaga cobertura legal para unha ofensiva de inspiración fascista que nin sequera respetou os procedementos legais existentes no país. Ademais, o goberno tamén ilegalizou a bandeira e o himno soviético, o símbolo da fouce e o martelo, e todos os monumentos e placas históricas relacionados coa conmmemoración do comunismo e a loita contra o nazi-fascismo. Mesmo se degradou a celebración do Día da Victoria para lembrar a "todas as vítimas da Segunda Guerra Mundial", equiparando aos nazis e aos que morreran loitando contra eles. En cambio, o goberno respaldou e considerou loitadores pola liberdade a organizacións que colaboraran co exército nazi e con responsabilidades directa en masacres de ucraínos, xudeus, poloneses e outras vítimas. Os símbolos das organizacións paramilitares e de extrema dereita son usados abertamente e están protexidos pola lei.

Enmarcamos esta decisión no contexto da proceso de expansión imperialista en Europa do Leste e da campaña represiva do goberno de Kiev, dominado por unha xunta criminal respaldada polos monopolios europeus e norteamericanos. Denunciamos como absolutamente inaceitável a prohibición da ideoloxía, a organización e a propaganda comunista en calquera parte do mundo, defendemos a recuperación e defensa da memoria histórica da heroica loita dos pobos europeus contra o monstro fascista e reiteramos a nosa solidariedade co pobo ucraíno. A ilegalización do comunismo é un novo paso que só acrecentará o sufrimento causado pola orquestada "revolta do Maidan", polo golpe de Estado e o conflito imperialista na rexión, precisamente na dirección contraria dun futuro de paz e soberanía que deposite o poder nas mans dos pobos.

Por último, queremos chamar a atención sobre o escaso eco que unha nova desta relevancia tivo na comunicación social do noso entorno. Os medios concentrados en grandes grupos empresariais escudriñan con extremo celo todos os acontecimentos políticos que acontecen en países con gobernos progresistas e anti-imperialistas, como o da Venezuela, para impulsar histéricas e permanentes campañas de denuncia de inexistentes violacións de dereitos humanos, persecucións de opositores políticos ou ausencia de garantías democráticas. En cambio, amparan implícita ou explicitamente unha violación tan flagrante de liberdades como a de asociación ou expresión como a que representa a ilegalización absoluta da ideoloxía e a memoria comunista por parte do goberno de Kiev, que se engade a anteriores e diversas medidas de prohibición de simboloxía comunista en países como Polonia, a República Checa, Hungría, Lituania ou Letonia. Máis unha vez comprobamos que os conceptos de democracia, liberdades ou expresión libre son meramente instrumentais e selectivos en mans dos grandes medios, utilizados para agredir aos gobernos e movementos disidentes do imperalismo, e ignorados ou enmascarados se se trata de acubillar aos aliados da Unión Europea e os Estados Unidos.